قصه كامله

استأذنت اني اطلع ارتاح هنا شوية انتي طردوكي لشنو 
قلت ليها بسبب واحد عارض وفي النهاية طردونا سوا 
ضحكت وقالت هيي استمتعي ايام الجامعة دي ما بتتعوض انا هسي زعلانة لأنو ايامي قربت تخلص 
قلت ليها دقيقة انتي متزوجةولا شنو لأنو متحننة
قالت ايوه متزوجة
قلت ليها كويس راجلك بخليكي تقري
قالت لي اي ما عندو مشكلة وزاتو هسي تعبي دا كلو من الحمل 
قلت ليها واااو ماشاءالله خبر حلو ربنا يحلك بالسلامة ان شاء الله
بالمناسبة انتي اسمك منو
قالت لي داليا وانتي
قلت ليها ليان 

قالت لي اتشرفنا
اتونسنا شوية وتلفونها دق ردت واتكلمت قالت لي يلا بعد دا مع السلامه راجلي جا قلت ليها باي باي
انتظرت اسيل واروى لحدي ما خلصو وطلعنا سوا وطبعا الاتنين كانو بضحكو على موقف رامي المضحك البايخ داك 
اسيل قالت الليلة هي بايتة معي كلمت ابوها ووافق
قلت ليها طيب ارح معي نجيب حاجاتي من بيت خالتو ريان ونمشي البيت سوا
لما وصلنا البيت لقينا امي قاعدة براها كالعادة سلمت علينا وقالت لينا لو جيعانين الاكل في المطبخ
قعدنا في غرفتي وخلاص كل واحده استحمت وصلت واستلمت السرير وباب الونسة فتح 
اسيل قالت لي عايني بالمناسبة نهاية السمستر دا نحن عاملين طلعة جماعية
قلت ليها انا وانتي واروى
قالت لي لا يا بت مع الدفعة كلها
قلت ليها والكلام دا كان متين وانا ما عارفة 
قالت لي لو بتقعدي مع الناس كان عرفتي الحاصل شنو المهم انتي ماشة ولا لا
قلت ليها حسب انتو ماشين وين 
الامتحانات بدت وكانت فترة صعبة شديد كلها توتر وخوف وتوقعات
المهم غايتو عدت على خير الحمد لله 
وقررت اطلع معاهم كنت عايزة اكلم ابوي لكن هو ليهو زي اسبوع كدا ما جا البيت امي قالت لي خليهو انا بكلمو انتي امشي وانبسطي وما تتأخري 
انا ماشة وبفكر قلت الليله لازم اتغير واكسر الحواجز البنيتها مع الطلاب واكون زولة منفتحة وانهي الخلافات 
وصلت المكان وكان عبارة عن حاجة كدا زي المطعم لكن ما كبير انا زاتي ما فهمت هو شنو مكان صغير وشبه مظلم
قلت معقول يعملو الجمعة في مكان زي دا 
لقيت لي طاولة كدا قعدت فيها قلت انتظر شوية يمكن انا الجيت بدري 
بعد شويه جا رامي قعد معاي وقال لي مساء الخير
قلت ليهو اهلين وين باقي الناس
قال لي سيبك منهم اتفضلي اشربي العصير دا اكيد بتكوني عطشانة وبعدين بحكي ليكي
شربت العصير و كان حلو شدید 
بعد سربتو بقيت حاسة نفسي مبسوطة شدید وعايزة ارقص 
رامي شغل اغنية وبقينا نرقص نحن الاتنين 
ومن هناك تاني انا ما متزكرة حاجة غير اني صحيت في مركز الشرطة 
خفت شديد وقمت مخلوعة وبقيت بكورك طلعوني من هنا 
انا عملت شنو ياعالم ساعدوني انا ما عملت حاجة 
بعد شوية جا شرطي فتح الباب وقال لي يلا الضابط دايرك 
حاولت اتكلم معاهو لكن ما در علي
وقفني جنب باب المكتب ومشى
دخلت و المكتب كان حلو وبااارد وكان في زول قاعد في الكرسي ومقبل على الحيطة
قلت السلام عليكم 
اتلفت علي بالكرسي واتفاجأت لم شفتو 
قلت ليهو مهند الحمدلله انو لقيتك انت انا ماعرفة جيت هنا كيف ولا لشنو عليك الله ساعدني
قال لي لو سمحتي دا مكان شغل وانتي حاليا محتجزة ف خلينا نتصرف على الاساس دا 
قلت ليهو طيب تهمتي شنو يا سيادة الضابط
قال لي حيازة ممنوعات وفحص الډم اثبت انك متعاطية وجودك في منطقة مشپوهة 
انا راسي طفش